Luonddudoalloguovllulohpi

Meahciráđđehusa luonddudoalloguovlluin Eanodagas, Anáris ja Ohcejogas sáhttá oastit luoddudoalloguovllulobi ovdamearkan boaldinmuoraid skáhppoma várás. Lohpi lea dahkkon eandalii báikkálaš ássiid ja luopmobartta oamastan olbmuid dárbbuide. Luonddudoalloguovllulobi sáhttá skáhppot go váldá oktavuođa guovllu oktavuođaolbmui.

Luonddudoalloguovllulobiin sáhtát skáhppot buktagiid dušše iežat atnui. Nuortalašlága vuođul boaldinmuoraid je. buktagiid stáhta eatnamiin oažžu olbmot eai dárbbaš skáhppot luonddudoalloguovllulobi.

Lobi várás váldde oktavuođa vuos guovllu oktavuođaolbmui ja bivdde čujuhusa buktaga viežžamii. Mávsse oktavuođaolbmuin soahpan lobi Eräluvat.fi-bálvalusas ja viečča buktaga sohppojuvvon báikkis easkka dan maŋŋá. Lohpi lea fámus 3 mánu. 

• Anára ja Ohcejoga oktavuođaolmmoš:  Toni Juuti, eanageavahanáššedovdi, tel. 040 184 2963, luontaisalueluvat@metsa.fi

• Eanodaga oktavuođaolmmoš: Marika Koskiniemi, eanageavahanáššedovdi, tel. 040 121 7079, luontaisalueluvat@metsa.fi

Luonddudoalloguovllulohpái gullevaš buktagat

• Soahke- ja beahceboaldinmuorra ceaggut (čujuhemiin): 2 m3
• Boazoáidestoalpu (čujuhemiin): 25 st.
• Jálássoagit, luohkkásieđggat. 4 st.
• Juovlabeahci: 3 st.
• Čikŋageađggit, muvrrageađggit: 2 m3

Lobit leat guokte: okta boaldinmuora váldimii ja nubbi eará buktagiidda. Lobit leat fámus 3 mánu.

Gos luonddudoalloguovllut leat?

Luonddudoalloguovllut leat čuovvovaš guovlluin:

• Eanodaga gielddas luonddudoalloguovllut leat Giehtaruohttasageainnu ja Geađgeluobbalgeainnu guorain ja Bálojohnjálmmi-Njunnásgeainnu davábealde.
• Anára gielddas luonddudoalloguovllut leat almmolaš geainnuid guorain Áŋŋelis, Gápmasis ja Bárttehis davás.
• Ohcejoga gielddas buot almmolaš geainnuid guorat leat luonddudoalloguovllut.

Álkimusat guovlluid sajádaga sáhtát dárkkistit Retkikartta.fi-bálvalusas go válljet kártadási “Ylä-Lapin luontaistalousalueet” (Davvi-Sámi luonddudoalloguovllut).

Rávvagat boaldinmuoraid váldimii luonddudoalloguovllulobiin

Sihkkarastte álo vuos, ahte guovlu, gos leat váldimin boaldinmuora, lea Meahciráđđehusa hálddašan luonddudoalloguovlu. Luonddudoalloguovllut leat Eanodaga, Anára ja Ohcejoga gielddain.

Boaldinmuorran vuvdet ealli ceakkosoagi ja ceakkobeazi. Eanamuora ii oaččo váldit. Boaldinmuora sáhtát váldit dušše oktavuođaolbmo čujuhemiin. Oktavuođaolmmoš stivre du sierra boaldinmuora čuohppanbáikki.

Boaldinmuora ii oaččo váldit almmolaš geainnuid, jávrriid, jogaid, ádjagiid, gálduid iige lávttasbáikkiid lahkasiin. Suodjeavádat om. báikkiide galgá leat unnimustá 30 mehtera. Boaldinmuora ii maiddái oaččo váldit Ohcejohleagis, gilličoahkkebáikkiid, ássanráhkadusaid iige luopmobarttaid lahkasiin.

Várrevilttiin sáhttet leat báikkuid hui šattolaš, juobe rođu lágan lávttasbáikkit, main šaddet earret eará gáiskkit. Dávisteaddji šattolaš, smávvaviidodaga šaddanbáikkit leat maiddái ceakkobávttiid vuolde. Dákkár eanadagat leat ráfáidahtton boaldinmuoraid váldimis.

Lotnjesoahki, suhpi, ráidá, skáhpi, guossa ja reatká leat muorat, maid galgá seastit. Soahkebohtuin galgá guođđit buoremus ja eallinfámolaččamus muoraid ceaggut.

Luonddudoalloguovllut lea eanaš lagešvuovddit, beahci lea báikkuid seahkalašmuorran. Lageš šaddá dáid guovlluin dávjá miesttalágan bohttun, mas leat seahkalagaid boares, jo oassái mieskagoahtán muorat, buoremus šaddandilis lean muorat ja nuorra vesát. Boaldinmuorran válljejuvvojit boarráseamos soahkebohtuin oassái jo mieskan, ruŋgguvigát, gierragis ja ovssiin goikan muoraid. Ovttaskas sogiid galgá guođđit ceaggut. Daid boaldinmuorračuohppanbáikkiin, main váldomuorran lea beahci, galget njealji mehtera suotnjara siste lean rieggá sisa báhcit unnimustá 8 beahceruŋggu ceaggut. Dimbbarmuora sturrosaš beazi ii oaččo váldit boaldinmuorran.

Boaldinmuora sáhttá váldit maiddái Ohcejoga gilvvabeahcevuvddiin om. njáskannjuolggadusa mielde.

Muoraid iskkusgilvvaguovlluin ii oaččo váldit, dat leat áidojuvvon.

Eana lea hui hearki ja lavdnji lea báikkuid dušše moadde sentte asu. Njeidojuvvon muoraid galgá dán dihtii fievrridit meahcis eret muohttaga áigge, jus daid ii leat vejolaš gurput luoddagurrii. Boaldinmuoraid fievrrideapmái galgá skáhppot Meahciráđđehusa meahccejohtaluslobi.

Luonddudoalloguovllulobiin boaldinmuora válddedettiin áššehas galgá almmuhit čuovvovaš dieđuid šleađgapoasttain čujuhussii luontaisalueluvat@metsa.fi dahje reivviin čujuhussii Metsähallitus kirjaamo, PL 80 (Opastinsilta 12 C), 00521 Helsinki.

• Namma
• Telefonnummir
• Boaldinmuora váldinbáiki (báikki namma dahje koordináhtat)
• Váldojuvvon boaldinmuorramearri

Fuomášathan, ahte huksendárbbuide muora ii sáhte váldit luonddudoalloguovllulobiin. Huksenmuoraid galgá diŋgot sierra iežas čujuhemiin oktavuođaolbmos (oktavuođadieđut bajábealde). Maiddái darffi ja lavnnji váldimii dárbbašuvvo iežas čujuheapmi oktavuođaolbmos. Luonddudoalloguovllulobiin ii maiddái sáhte váldit čievrra dahje sáddo.