Guolástus

Guolásteapmái dárbbašat dábálaččat guolleváriiddikšunmávssu ja dávjá maiddái sierra guolástanlobi. Guolleváriiddikšunmáksu lea guolásteaddji bákkolaš vuođđomáksu, mii lea fámus olles Suomas. Guolástanlobiid vuvdet čáhceguovlluid oamasteaddjit. Meahciráđđehusas oaččut guolástanlobiid stáhta čáhceguovlluide. Juos ásat sápmelaččaid ruovttuguovllus, guolásteapmi stáhta čáhceguovlluin lea dutnje eanaš sajiin nuvttá. Gieldalaččaid guolástanvuoigatvuođain sáhtát lohkat lasi dáppe.

Guolleváriiddikšunmávssu galgá máksit jos lea 18–69-ahkásaš ja guolásta vuokkain dahje bivdosiin dahje bivdá reappáid. Dát oaivvilda dan ahte go guolástat ovdamearkka dihtii šlivgunstákkuin, sáimmain dahje guollehehkiin, dárbbašat álo máksit guolleváriiddikšunmávssu. Spiehkastahkan leat guolásteaddjit, geat gerge deavdit unnimustá 65 jagi 31.12.2023 rádjai.

Dalle go guolástat dušše ovtta stákkuin, ovdamearkka dihtii šlivgunstákkuin, dušše beare guolleváriiddikšunmáksu lea doarvái stuorra oasis riikka. Juos geavahat eanet stákkuid, guolástat bivdosiin dahje bivddát reappáid, dárbbašat guolleváriiddikšunmávssu lassin guolástanlobi čáhceguovllu oamasteaddjis. Dárbbašat čáhceguovllu oamasteaddji lobi maiddái dalle, go guolástat guoika- ja rávdnječáziin dahje sierračuozáhagain. Eanaš oassi Meahciráđđehusa guolástančuozáhagain leat dákkáraš čuozáhagat, nuba jos dain áigu guolástit galgá oastit guolleváriiddikšunmávssu lassin sierra guolástanlobi. 

Eanodaga, Anára ja Ohcejoga gieldda olbmuin leat guolástanláhkii vuođđuduvvan sierravuoigatvuođat iežas ruovttugieldda guovllus. Gieldalaččaide guolásteapmi stáhta čáziin lea eanaš nuvttá. Spiehkastahkan luosa ja dápmoha goargŋunguovllut, maidda gieldda olbmot sáhttet oastit iešgoasttádusa hattiin áigodatlobi.

Guolástanlohpi lea investeren lundui, dasgo Meahciráđđehus geavaha lohpeboađuid guollečáziid dikšumii ja guolástanvejolašvuođaid dorvvasteapmái. Maiddái guolásteaddjiid addán sálašmáhcahagas lea mearkkašahtti rolla suvdilis guolástanordnemiid plánemis.