Háhkan- ja šluhtteneavttut

Dát eavttut leat ođasmahttojuvvon maŋimuš 19.11.2024.

Háhkan- ja šluhtteneavttuin leat čuovvovaš namahusat:

Diŋgojeaddji mearkkaša olbmo, guhte ollašuhttá diŋgojumi, nappo ovdamearkka dihtii oastá lobi. Diŋgojeaddjis lea ovddasvástádus iežas diŋgojumis, iežas addin dieđuin ja diŋgojupmái laktáseaddji mávssuin ja eavttuid mieldásaš nuppástusain ja šluhttemiin.
Diŋgojupmi mearkkaša oastima dahje várrema, masa šaddá diŋgonnummir. Ovtta diŋgojumis sáhttet leat máŋga lobi ja/dahje eará buktagat dahje bálvalusat, mat várrejuvvojit dahje ostojuvvojit neahttagávppi bokte.
Lobi geavaheaddji lea olmmoš, geas lea riekti geavahit lobi. Lobi geavaheaddji namma lea merkejuvvon lohpái. Diŋgojeaddji galgá almmuhit lobi geavaheaddji dieđuid diŋgojumi oktavuođas. Dieđut gieđahallojuvvojit diehtosuodječilgehusa mielde ja diŋgojeaddjis lea ovddasvástádus das, ahte lobiid geavaheaddjit leat diđolaččat das. Vuollil 16-jahkásaš olbmo dieđuid vurkemii dárbbašuvvo fuolaheaddji miehtan. Lobi geavaheaddji dahje diŋgojeaddji sáhttiba leat maiddái seammá olmmoš.
Lohpi mearkkaša čuoggás B Meahciráđđehusa guolástan-, meahccebivdo- ja luonddubuvttalobiid, earret vuonccesloddeáigodatlobiid, mat gieđahallojuvvojit čuoggás C. Meahciráđđehusa meahccejohtaluslobit gieđahallojuvvojit čuoggáin D–E.
Háhkan- ja šluhtteneavttut mearkkašit dáid eavttuid.

Meahciráđđehusa meahccebivdo-, guolástan- ja meahccejohtaluslobit leat hálddahusmearrádusat. Jus lea duhtameahttun mearrádussiii, njulgema oažžu ohcat Meahciráđđehusas 30 beaivvi siste dan maŋŋá, go lea ožžon dieđu mearrádusas. Njulgengáibádusčujuhusa oažžu Meahciráđđehusa Meahccelobiid (Eräluvat) áššehasbálvalusas. Njulgenmearrádusas ferte máksit.

A. Almmolaš eavttut

Diŋgojeaddjis lea alddis ovddasvástádus das, ahte son lea ovdal diŋgoma oahpásmuvvan

ieš lohpái, bálvalussii dahje buktagii laktáseaddji dokumeanttaide ja eavttuide,
Eräluvat.fi-neahttabálvalusa geavahaneavttuide ja diehtosuodječilgehussií ja
dáid háhkan- ja šluhtteneavttuide.

Jus diŋgojeaddji ii dohkket ovddabealde namuhuvvon eavttuid, son ii maiddái sáhte háhkat lobiid dahje eará buktagiid dahje bálvalusaid, maidda eavttut gusket.

1. Diŋgon ja eavttuid dohkkeheapmi

Diŋgojumi sáhttá dahkat Eräluvat.fi-neahttabálvalusas dahje Meahciráđđehusa Meahccelobiid áššehasbálvalusa bokte.

Neahttabálvalusas diŋgojeaddji lasiha oastinkorii lobiid/buktagiid/bálvalusaid, maid áigu oastit dahje várret. Go lea sirdašuvvan máksit, de diŋgojeaddji deavdá álggus iežas dieđuid. Dán maŋŋá diŋgojeaddji deavdá vejolaš lobiid geavaheaddjiid dieđuid. Diŋgojeaddji dohkkeha eavttuid cehkkemiin čuoggá “Dohkkehan háhkan- ja šluhtteneavttuid” ja nannemiin diŋgojumi. Čadni soahpamuš šaddá, go diŋgojeaddji lea čađahan mávssu.

Áššehasbálvalusa bokte diŋgodettiinis áššehas ferte addit diŋgojupmái gáibiduvvon dieđuid. Áššehas oažžu e-poasttain dahje dárbbu mielde báberhámis diŋgonnannehusa, dáid eavttuid ja máksindieđuid.

Jus diŋgojupmi spiehkkasa ovddabealde čilgejuvvon dilis, diŋgojeaddji ferte dalánaga váldit oktavuođa Meahciráđđehusa Meahccelobiid áššehasbálvalussii.

2. Neahttabálvalusa ráddjehusat

Meahciráđđehus ii dáhkit, ahte áššehasa diŋgojupmi lihkostuvvá. Diŋgojupmi sáhttá eahpelihkostuvvat, jus gažaldatvuloš buvtta nohká danin, ahte seammá áigge dahkkojuvvo nubbi diŋgojupmi. Vuogádat sáhttá maid bahkašuvvat, mii soaitá dagahit doaibmahehttehusa, man dihtii diŋgojupmi ii lihkostuva. Jus buktagat, maid diŋgojeaddji háliida, leat oažžumis dušše dihto veardde, Meahciráđđehus ii dáhkit, ahte diŋgojeaddji oažžu lobi dahje eará buktaga/bálvalusa dan guvlui ja áigodahkii, gosa son álgoálggus geahččalii oastit dahje várret lobi dahje eará buktaga/bálvalusa.

Meahciráđđehusas ii leat ovddasvástádus vahágis, mii lea šaddan geavahančuolmmain, boatkkagiin dahje eará teknihkalaš sivain, mat váttásmahttet neahttabálvalusa geavaheami. Máksin ja máhccan doppe ruovttoluotta neahttabálvalussii dáhpáhuvvá goalmmát oassebeali bálvalusas, man doaimmain Meahciráđđehusas ii leat ovddasvástádus. Meahciráđđehusas ii maiddái leat ovddasvástádus vahágiin, mat badjánit eahpenjuolga diŋgojeaddjái, go diŋgojupmi ii lihkostuva.

Diŋgojumi oktavuođas diŋgojeaddjis alddis lea ovddasvástádus das, ahte son oažžu neahttabálvalusas alcces diŋgojupmái laktáseaddji dokumeanttaid dego diŋgonnannehusa, eavttuid ja eará vejolaš dieđuid, mat laktásit lohpái, buktagii dahje bálvalussii. Vuogádat sádde lihkostuvvan diŋgojumis nannehusšleađgapoastta ja dárbbašuvvon dokumeanttaid dan e-poastačujuhussii, man diŋgojeaddji lea registreredettiinis dahje diŋgojumi oktavuođas addán. Dát šleađgapoastanannehus ii leat eaktu dasa, ahte soahpamuš šaddá, muhto baicca soahpamuš ja dan máksingeatnegasvuohta leat šaddan juo árabut, go diŋgojeaddji lea dohkkehan ja nannen diŋgojumi.

3. Diŋgojumi máksin

Eräluvat.fi-neahttabálvalusa bokte dahkkojuvvon diŋgojumit máksojuvvojit neahttabálvalusas. Meahciráđđehusa bargit eai sádde diŋgojeaddjái rehkegiid, nannehusa dahje eará sullasaš dieđuid neahttabálvalusa bokte dahkkojuvvon diŋgojumis.

Áššehasbálvalusa bokte dahkkojuvvon diŋgojumit máksojuvvojit álgovurrosaččat máksinliŋkka bokte.

Diŋgojeaddjis alddis lea ovddasvástádus das, ahte son máksá diŋgojumis máksinearrebeaivvi rádjái. Diŋgojumit, mat máksojuvvojit neahttabálvalusas dahje máksinliŋkka bokte, šluhttejuvvojit automáhtalaččat, jus dat eai máksojuvvo máksinearrebeaivvi rádjái. Dát ii guoskka lobiide, mat ohccojuvvojit ohcamušain.

Lobit, mat ohccojuvvojit ohcamušain máksojuvvojit álgovurrosaččat máksinliŋkka bokte. Gieđahallojuvvon mávssekeahtes lohpeohcamušas sáddejuvvo diŋgojeaddjái bearrangelbbolaš rehket, jus rehket ii leat máksojuvvon máksinearrebeaivvi rádjái.

Dárbbu mielde áššehasbálvalusa bokte sáhttá dahkat diŋgojumi, mii máksojuvvo rehkegiin. Rehketdiŋgojumit eai šluhttejuvvo automáhtalaččat.

4. Diŋgojumi rievdadeapmi dahje šluhtten

Diŋgojumi sáhttá rievdadit dušše Meahciráđđehusa Meahccelobiid áššehasbálvalusa bokte gažaldatvuloš lohpái, buktagii dahje bálvalussii guoski eavttuid mielde.

Mávssekeahtes diŋgojumi sáhttá šluhttet ovdal máksinearrebeaivvi almmá gieđahallangoluid haga, jus gažaldatvuloš lobi, buktaga dahje bálvalusa eavttuin ii namuhuvvo eará láhkai.

Áššehasbálvalusa bokte diŋgojuvvon diŋgojumi, mii máksojuvvo máksinliŋkkain, sáhttá šluhttet áššehasbálvalusa bokte. Seammá guoská diŋgojupmái, mii lea dahkkojuvvon Eräluvat.fi-neahttabálvalusas ieš. Guktot sáhttiba šluhttejuvvot maiddái neahttabálvalusa áššehaskonttu bokte, jus diŋgojupmi lea ovttastahttojuvvon áššehaskontui, mii lea juo leahkimin. Jus diŋgojupmi ii máksojuvvo, dat šluhttejuvvo automáhtalaččat máksinearrebeaivvi maŋŋá (earret lobit, mat ohccojuvvojit ohcamušain).

Áššehasbálvalusa bokte diŋgojuvvon diŋgojumi, mii máksojuvvo rehkegiin, sáhttá šluhttet dušše Meahccebálvalusaid áššehasbálvalusa bokte. Dat ii leat šluhttejupmi, jus guođđá rehkega mávssekeahttá.

Máksojuvvon diŋgojumi šluhtten dahje rievdadeapmi ii leat vejolaš, jus gažaldatvuloš lobi, buktaga dahje bálvalusa eavttuin ii namuhuvvo eará láhkai.

Meahciráđđehus ii mávsse ruovttoluotta supmiid, mat leat vuollil 30 euro.

5. Máksogaskkusteaddji dieđut

Mávssuid gaskkustanbálvalusa ollašuhttá ja máksinbálvalusa fállá Paytrail Oyj (2122839-7) ovttasbarggus suopmelaš báŋkkuid ja loatnalágádusaiguin. Visa- dahje MasterCard-koarttaiguin mávssedettiin Paytrail Oyj oidno mávssu vuostáiváldin, ja dat gaskkusta mávssu Meahciráđđehussii. Paytrail Oyj:s lea máksolágádusa doaibmalohpi.

6. Bággobearrangelbbolašvuohta

Dat ii leat šluhttejupmi, jus guođđá rehkega mávssekeahttá. Rabas ruhtaoažžumat leat bearran- ja bággobearrangelbbolaččat.

Meahciráđđehusas addojuvvon lága (234/2016) 24§ ja stáhta máksovuođđolága (150/1992) 11 § vuođul máksu Meahciráđđehusa almmusvuoigatvuođalaš bálvalusas soaitá bearrat almmá duomu dahje mearrádusa haga dan ortnega mielde go vearuid ja mávssuid bearramis bággobearrandoaimmas addojuvvon lágas (367/61) ásahuvvo.

7. Persovdnadieđuid registreren, gieđahallan ja addin

Meahccelobit-bálvalusa diehtosuodječilgehusa sáhttá lohkat čujuhusas eraluvat.fi/tietosuojaseloste dahje dan sáhttá bivdit alcces riŋgemiin Meahciráđđehusa Meahccelobiid bálvalusnummirii 020 69 2424.

B. Guolástan-, meahccebivdo- ja luonddubuvttalobiid eavttut

Meahciráđđehusas ii dávjjimusat leat ovddasvástádus meahccebivdo- ja guolástanáiggiid dieđiheamis, muhto baicca áššehas lea geatnegahttojuvvon dárkkistit áiggiid virggálaš dieđihankanálain, nappo Suoma fuođđoguovddáža riista.fi-siidduin, kalastusrajoitus.fi-bálvalusas dahje eanan- ja vuovdedoalloministeriija siidduin mmm.fi.

1. Mávssekeahtes diŋgojumi šluhtten, rievdadeapmi dahje sirdin nuppi olbmui

Mávssekeahtes diŋgojumi sáhttá šluhttet ovdal máksinearrebeaivvi almmá gieđahallangoluid haga čuoggás A 4 muitaluvvon vugiin.

Jus mávssekeahtes diŋgojupmi rievdaduvvo, nuppástusas berrojuvvojit 15 euro sturrosaš gieđahallangolut. Nuppástusaid ferte dahkat Meahciráđđehusa Meahccelobiid áššehasbálvalusa bokte ovdal diŋgojumi máksima earrebeaivvi.

Earrebeaivvi maŋŋá mávssekeahtes diŋgojumi ii sáhte šluhttet, rievdadit dahje sirdit lobi nuppi olbmui.

2. Máksojuvvon diŋgojumi dahje lobi šluhtten, rievdadeapmi dahje sirdin nuppi olbmui

Máksojuvvon diŋgojumi dahje dan lobi ii sáhte sirdit nuppi olbmui, nuppi áigodahkii dahje nuppi lohpeguvlui.

Dihto diliin diŋgojeaddjis lea vuoigatvuohta šluhttet lobi ja oažžut ruovttoluotta das máksojuvvon hatti. Unnimus ruhtasubmi, mii máhcahuvvo, lea 30 euro.

Persovnnalaš lobi sáhttá šluhttet dušše, jus diŋgojeaddji ieš, lobi geavaheaddji dahje sidjiide lagaš olmmoš buohccá duođalaččat, gártá duođalaš bártái dahje jápmá. Lagašolmmožin gávnnahuvvo náittosguoibmi, ássanguoibmi, mánná, váhnen, vuohppa ja vuoni, oarbin, áhkkut ja áddjut, áhkku ja áddjá. Lobi sáhttá maid šluhttet, jus diŋgojeaddjái dahje lobi geavaheaddjái geavvá mii nu eará vuorddekeahtes ja duođalaš bárti. Eará vuorddekeahtes ja duođalaš bárti lea ovdamearkka dihtii mearkkašahtti vahát opmodahkii, dego dálu buollin. Duođalaš vahágin ii gávnnahuvvo ovdamearkka dihtii jus beana buohccá dahje jápmá dahje biila cuovkana.

Šluhtten ferte dahkkojuvvot ovdal go lohpeáigi álgá. Jus šluhttejupmi dahkkojuvvo ovddabealde namuhuvvon sivaid dihtii dalle, go lohpeáigi lea juo álgán, lobi haddi ii buhttejuvvo.

Diŋgojeaddji ferte almmuhit šluhttemis dakkaviđe Meahciráđđehusa Meahccelobiid áššehasbálvalussii. Son galgá ovdanbuktit lobi geavaheami eastaga luohtehahtti čilgehusain nu jođánit go vejolaš. Eastaga galgá duođaštit maŋimustá guovtti vahku siste dan ihtima maŋŋá, earret jus dán mearreáiggi lea mearehis váttis čuovvut. Luohtehahtti čilgehussan gávnnahuvvo doavtterduođaštus, dearvvašvuođadikšára duođaštus, bolesdutkanbeavdegirji dahje dáhkádusfitnodaga cealkámuš. Duođaštussan dohkkehuvvo maiddái bargoaddi duođaštus luomu sirdimis, duođaštus oahpuid álggaheamis dahje geardunhárjehallamis. Duođaštusas fertejit leat duođaštusa addi oktavuođadieđut. Čilgehusa ferte doaimmahit Meahciráđđehussii čujuhussii Metsähallitus Eräpalvelut, PL 81, 90101 OULU dahje šleađgapoasttain čujuhussii eraluvat@metsa.fi. Čielggadeamis ferte lassin namuhit, man lohpái šluhttejupmi guoská (lohpenummir).

3. Guollenáliiddikšunmáksu

Guollenáliiddikšunmávssuide guoskaduvvojit čuoggás B 1 ja B 2 muitaluvvon lohpeeavttut muđui, muhto guollenáliiddikšunmávssuid nuppástusain eai berrojuvvo gieđahallangolut.

Guolástanlága 81 § mielde Meahciráđđehusas ii almmá erenomáš siva haga leat geatnegasvuohta doaimmahit ođđa duođaštusa guollenáliiddikšunmávssu máksimis, jus olmmoš lea láhppán ovddit duođaštusas.

Meahciráđđehusas ii almmá erenomáš siva haga leat geatnegasvuohta máhcahit feaillalaččat máksojuvvon guollenáliiddikšunmávssu.

Jus diŋgojeaddji lea máksán guollenáliiddikšunmávssu jahkemávssu guktii, badjelmearálaš máksu sáhttá sirdojuvvot diŋgojeaddji almmuhan olbmui. Jus badjelmearálaš guollenáliiddikšunmávssu ii sáhte sirdit nuppi olbmui, badjelmearálaš mávssu sáhttá máhcahit. Áššehas ferte leat njuolga oktavuođas Meahciráđđehusa Meahccelobiid áššehasbálvalussii maŋimustá 90 jándora siste mávssu máksima maŋŋá, vai máhcaheapmi dahje nuppástus lea vejolaš.

Jus oanehisáigásaš guollenáliiddikšunmáksu lea máksojuvvon guktii, máksu sáhttá sirdojuvvot nuppi olbmui. Nuppástusa ferte dahkat ovdal go lohpeáigi álgá.

4. Stággobivdolobi šluhtten spiehkastatdilis

Jus čáhci guolástančuozáhagas lieggana badjel 21 gráđđii, Meahciráđđehus sáhttá gaskaboddosaččat gaskkalduhttit lohpevuovdima čuozáhahkii dorvvastan dihtii lunddolaš luossanáli. Lohpevuovdima ferte gaskkalduhttit álo dihto áigodahkii, man maŋŋá dilli árvvoštallojuvvo ođđasit.

Jus stággobivdolohpi lea juo háhkkojuvvon dihto áigodahkii, diŋgojeaddji sáhttá

šluhttet máksojuvvon lobi ollásit ja oažžut ruđaid ruovttoluotta. Lobi ferte šluhttet ovdal go lohpi álgá Meahciráđđehusa Meahccelobiid áššehasbálvalusas. Spiehkastatdilis ja daidda laktáseaddji ruđaid máhcahemiid birra gulahallet álo sierra Eräluvat.fi-bálvalusas.
guolástit máksojuvvon lobiin, jus háliida. Dát ii goittotge ávžžuhuvvo. Meahciráđđehus ii sáhte ovttabealagit nuppástuhttit dahje šluhttet guolástanlobi almmá lobi diŋgojeaddji miehtama haga.

5. Meahccebivdolobiid šluhtten bivdoáiggiid regulerema dihtii

Meahciráđđehus vuovdá meahccebivdolobiid maiddái ovdal go eanan- ja vuovdedoalloministeriija lea nannen vuovdevuoncáid bivdoáiggiid láhkaásahusa boahttevaš meahccebivdojahkái. Čavčča lohpevuovdinvahkus vuovdimassii ásahuvvon vuonccesloddelobit vuođđuduvvet eanan- ja vuovdedoalloministeriija láhkaásahushápmosii bivdoáiggiid birra.

Jus bivdoáiggit eai leat nannejuvvon ovdal lohpevuovdima álgima, áššehas ferte álgovurrosaččat oahpásmuvvat Eräluvat.fi-bálvalusas almmustahttojuvvon láhkaásahushápmosii vuođđuduvvi bivdoáiggiide. Meahciráđđehus šluhtte ovdal vuovdevuoncáid bivdoáiggiid láhkaásahusa nannema ostojuvvon vuonccesloddelobiid dušše dalle, go nannejuvvon láhkaásahus ii daga vejolažžan mange vuovdevuonccesšlája meahcásteami dalle, go lohpi lea fámus. Dáin spiehkastatdiliin ja daidda laktáseaddji ruđaid máhcahemiin gulahallet álo sierra Eräluvat.fi-bálvalusas.

6. Sállaša almmuheapmi

Lobi geavaheaddji leat geatnegas almmuhit, man ollu lea ožžon sállaša dalán, go bivdu lea nohkan (meahcástanláhka 46 §). Sálašdieđut almmuhuvvojit álgovurrosaččat neahtas čujuhusas saalispalaute.eraluvat.fi.

Guollebivddu sálasmáhcahat addojuvvo omakala.fi-bálvalusa bokte ja muhtin dáhpáhusain maiddái sierra lohpeguovllu lohpeeavttuin govviduvvon vugiin.

C. Vuonccesloddeáigodatlobiid eavttut

1. Mávssekeahtes vuonccesloddeáigodatlobi šluhtten dahje rievdadeapmi

Gieđahalakeahtes vuonccesloddeáigodatlohpeohcamuša sáhttá šluhttet dahje dan sáhttá rievdadit ohcanáigodagas Eräluvat.fi-neahttabálvalusa bokte.

Mieđihuvvon mávssekeahtes vuonccesloddeáigodatlobi sáhttá háliidettiinis šluhttet ovdal máksima earrebeaivvi almmá šluhttengoluid haga. Lohpi šluhttejuvvo váldimiin oktavuođa Meahciráđđehusa Meahccebálvalusaid áššehasbálvalussii. Máksinearrebeaivvi maŋŋá vuonccesloddeáigodatlobi ii sáhte šat šluhttet, ja lobi ferte máksit ollásit. Dat ii leat šluhttejupmi, jus guođđá mávssekeahttá mieđihuvvon lobi. Mieđihuvvon vuonccesloddeáigodatlobi ii sáhte rievdadit dahje sirdit nuppi olbmui.

2. Máksojuvvon vuonccesloddeáigodatlobi rievdadeapmi

Máksojuvvon vuonccesloddeáigodatlobi ii prinsihpalaččat sáhte šluhttet.

Dihto diliin máksojuvvon vuonccesloddeáigodatlobi sáhttá šluhttet ja diŋgojeaddjis lea vuoigatvuohta oažžut ruovttoluotta das máksojuvvon hatti. Lobi sáhttá šluhttet, jus lobi ožžon olmmoš ieš dahje su lagašolmmoš buohccá duođalaččat, gártá duođalaš bártái dahje jápmá. Lagašolmmožin gávnnahuvvo náittosguoibmi, ássanguoibmi, mánná, váhnen, vuohppa ja vuoni, oarbin, áhkkut ja áddjut, ja áddjá ja áhkku. Lobi sáhttá šluhttet maiddái dalle, jus lobi geavaheaddjái geavvá mii nu eará vuorddekeahtes ja duođalaš bárti. Eará vuorddekeahtes ja duođalaš bárti lea ovdamearkka dihtii mearkkašahtti vahát opmodahkii, dego dálu buollin. Duođalaš vahágin ii gávnnahuvvo ovdamearkka dihtii dat, jus beana buohccá dahje jápmá dahje biila cuovkana.

Šluhtten ferte dahkkojuvvot ovdal go lohpeáigi álgá. Jus ovddabealde namuhuvvon sivaid dihtii lohpi šluhttejuvvo dalle, go lohpi lea juo fámus (1.8.), lobi haddi ii buhttejuvvo.

Diŋgojeaddji ferte almmuhit šluhttemis dalán Meahciráđđehusa Meahccelobiid áššehasbálvalussii. Son galgá duođaštit lobi geavaheami eastaga luohtehahtti čilgehusain nu jođánit go vejolaš. Eastaga galgá duođaštit maŋimustá guovtti vahku siste dan ihtima maŋŋá, earret jus dán mearreáiggi lea mearehis váttis čuovvut. Luohtehahtti čilgehussan gávnnahuvvo doavtterduođaštus, dearvvašvuođadikšára duođaštus, bolesdutkanbeavdegirji dahje dáhkádusfitnodaga cealkámuš. Čilgehusa ferte doaimmahit Meahciráđđehussii čujuhussii Metsähallitus Eräpalvelut, PL 81, 90101 OULU dahje šleađgapoasttain čujuhussii eraluvat@metsa.fi. Čielggadeamis ferte lassin namuhit, man lohpái šluhttejupmi guoská (lohpenummir).

D. Meahccejohtaluslobiid eavttut

1. Mávssekeahtes luoddalobi šluhtten

Mávssekeahtes diŋgojumi sáhttá šluhttet ovdal máksima earrebeaivvi almmá gieđahallangoluid haga čuoggás A 4 govviduvvon vugiin.

2. Máksojuvvon luoddalobi šluhtten

Luoddalobi diŋgojeaddjis lea vuoigatvuohta šluhttet máksojuvvon lobi ja oažžut buhtadusa lohpemávssus čuovvovaš eavttuiguin:

Jus šluhttejupmi dahkkojuvvo ovdal go lohpi lea fámus, diŋgojeaddjái buhttejuvvo lobi haddi.
Jus šluhttejupmi dahkkojuvvo dalle, go lohpi lea juo fámus, máksu ii máhcahuvvo.

Šluhttejumi ferte dahkat sáddemiin šleađgapoastta čujuhussii maastoliikenneluvat@metsa.fi. Unnimus ruhtasubmi, mii máhcahuvvo, lea 30 euro.

3. Luoddalobi rievdadeapmi dahje sirdin nuppi olbmui

Luoddalobi ii sáhte rievdadit dahje sirdit nuppi olbmui. Luoddalobi ferte šluhttet čuoggá D 1 ja D 2 šluhtteneavttuid mielde, man maŋŋá luoddalobi sáhttá oastit ođđasit nuppástuhtton dieđuiguin.

4. Gieđahalakeahtes gielkáluottaid olggobeale meahccejohtaluslohpeohcamuša šluhtten

Gielkáluottaid olggobeallái ohccojuvvon meahccejohtaluslobi sáhttá šluhttet, jus diŋgojeaddji šluhttet lobi ovdal go Meahciráđđehus lea dahkan ohcamuššii meahccejohtaluslohpemearrádusa (mieđihuvvon dahje ii mieđihuvvon). Šluhttejupmi ferte dahkkojuvvot sáddemiin šleađgapoastta čujuhussii maastoliikenneluvat@metsa.fi. Lohpeohcamuša šluhttema gieđahallamis berrojuvvo birasministeriija láhkaásahusa (96/2024) 7 § vuođul dahkkojuvvon bargomeari vástideaddji máksu.

5. Meahciráđđehusa gieđahallan gielkáluottaid olggobeale meahccejohtaluslobi šluhtten birgetmeahttun eastaga dihtii

Álgovurrosaččat Meahciráđđehusa addin gielkáluottaid olggobeale meahccejohtaluslobi (dás duohko lohpi) ii sáhte šluhttet.

Lobi sáhttá goittotge šluhttet, jus diŋgojeaddji ieš, lobi geavaheaddji dahje sidjiide lagaš olmmoš buohccá duođalaččat, gártá duođalaš bártái dahje jápmá. Lagašolmmožin gávnnahuvvo náittosguoibmi, ássanguoibmi, mánná, váhnen, vuohppa ja vuoni, oarbin, áhkkut ja áddjut, ja áddjá ja áhkku. Lobi sáhttá šluhttet maiddái dalle, jus lobi geavaheaddjái geavvá mii nu eará vuorddekeahtes ja duođalaš bárti. Eará vuorddekeahtes ja duođalaš bárti lea ovdamearkka dihtii mearkkašahtti vahát opmodahkii, dego dálu buollin. Duođalaš vahágin ii gávnnahuvvo ovdamearkka dihtii dat, jus beana buohccá dahje jápmá dahje biila cuovkana.

Diŋgojeaddji (dahje dat, gii dikšu áššiid diŋgojeaddji beales) ferte almmuhit šluhttemis dalán sáddemiin šleađgapoastta čujuhussii maastoliikenneluvat@metsa.fi. Son galgá duođaštit lobi geavaheami eastaga luohtehahtti čilgehusain nu jođánit go vejolaš. Eastaga galgá duođaštit maŋimustá guovtti vahku siste dan ihtima maŋŋá. Luohtehahtti čilgehussan gávnnahuvvo doavtterduođaštus, dearvvašvuođadikšára duođaštus, bolesdutkanbeavdegirji dahje dáhkádusfitnodaga cealkámuš. Čilgehusa galgá doaimmahit Meahciráđđehussii čujuhussii Metsähallitus Eräpalvelut, PL 81, 90101 OULU. Čilgehusas galgá lassin namuhit, man lohpái šluhtten guoská (lohpenummir).

Dohkálaš siva vuođul šluhttejuvvon lobis máhcahuvvo ruovttoluotta das máksojuvvon haddi. Jus ášši lea fámohuvvan ohcamuša šluhttema dahje ohcci geažil eará siva dihtii, ášši gieđahallamis berrojuvvo birasministeriija láhkaásahusa (96/2024) 7 § vuođul dahkkojuvvon bargomeari vástideaddji oassi mávssus sierra rehkegiin. Unnimus ruhtasubmi, mii máhcahuvvo, lea 30 euro. Jus ovddabealde namuhuvvon sivaid dihtii šluhttejupmi dahkkojuvvo dalle, go lohpi lea juo fámus, ii lobi haddi buhttejuvvo ruovttoluotta iige lohpi sirdojuvvo eará olbmui.

6. Meahciráđđehusa gieđahallan gielkáluottaid olggobeale meahccejohtaluslobi šluhtten almmá erenomáš siva haga

Meahciráđđehusa addin gielkáluottaid olggobeale meahccejohtaluslohpemearrádusa (mieđihuvvon dahje ii mieđihuvvon) ii sáhte šluhttet almmá čuoggás D 5 namuhuvvon erenomáš siva haga.

Dat ii leat šluhttejupmi, jus guođđá lohpemearrádusa mávssekeahttá.

7. Meahciráđđehusa gieđahallan gielkáluottaid olggobeale meahccejohtaluslobi rievdadeapmi dahje sirdin nuppi olbmui almmá erenomáš siva haga

Meahciráđđehusa addin gielkáluottaid olggobeale meahccejohtaluslobi (mieđihuvvon dahje ii mieđihuvvon) ii sáhte rievdadit. Lobi ii sáhte maiddái sirdit nuppi olbmui.

E. Meahccejohtalusa fitnodat- ja joavkolobiid eavttut

1. Gieđahalakeahtes fitnodat- dahje joavkolobi šluhtten

Fitnodat- dahje joavkolobi sáhttá šluhttet, jus diŋgojeaddji šluhtte lobi ovdal go Meahciráđđehus lea dahkan ohcamuššii guoski meahccejohtalusmearrádusa (mieđihuvvon dahje ii mieđihuvvon). Šluhttejumi ferte dahkat sáddemiin šleađgapoastta čujuhussii maastoliikenneluvat@metsa.fi. Lohpeohcamuša šluhttema gieđahallamis berrojuvvo birasministeriija láhkaásahusa (96/2024) 7 § vuođul dahkkojuvvon bargomeari vástideaddji máksu.

Meahccejohtalussafárifitnodat almmuha iešguđet safári meahccejohtaluslobiid iešheanalis. Iešguđege safári meahccejohtaluslobi ii sáhte šluhttet lobi almmuhusa maŋŋá.

2. Meahciráđđehusa gieđahallan fitnodat- dahje joavkolobi šluhtten

Fitnodat- dahje joavkolobi ii sáhte šluhttet, go Meahciráđđehus lea addán dáidda guoski meahccejohtaluslohpemearrádusa (mieđihuvvon dahje ii mieđihuvvon).

Dat ii leat šluhttejupmi, jus guođđá lohpemearrádusa mávssekeahttá.

3. Meahciráđđehusa gieđahallan fitnodat- dahje joavkolobi rievdadeapmi dahje sirdin nuppi olbmui nammii

Meahciráđđehusa addin fitnodat- dahje joavkolohpemearrádusa (dás duohko meahccejohtaluslohpi/lohpi) ii sáhte rievdadit dahje sirdit nuppi olbmo nammii.

Dihto safárii mieđihuvvon meahccejohtaluslobi ii sáhte rievdadit lobi almmuheami maŋŋá.

F. Stobut ja eará várrenvuloš čuozáhagaid eavttut

Stobuid ja eará várrenvuloš čuozáhagaid oasil diŋgojeaddji dohkkeha dáid eavttuid čuoggá A. Almmolaš eavttut ja čujuhusas www.eraluvat.fi/se/stobut/stohpovarrejeaddji-diehtobanku/stobuid-varreneavttut gávdnojit várreneavttut.