Miäcástem

Jis tun aasah sämmilij päikkikuávlust tâi mottoom eres miäcástemlaavâ 8 § čujottem kuávlust Tave-Suomâst, te tun jieh taarbâš sierânâs love miäccástmân jieijâd kieldâst staatâ enâmijn.

Eres tábáhtusâst tun puávtáh haahâđ Eräluvat.fi-palvâlusâst jieškote-uvlágán miäcástemluuvijd smavâmeccivalje já stuorrâmeccivalje pivdem várás. Staatâ kuávlust tähiduvvoo miäcástemmáhđulâšvuotâ meid toid, kiäin ij lah máhđulâšvuotâ miäcástiđ ovdâmerkkân miäcástemseervi kuávlust.

Miäcástemlope tuárju luándu, tondet ko Meccihaldâttâs tipšo lopepuáđuiguin meccivalje-enâmijd já visásmit uđâsmuvvee meccivaljenääli. Meccihaldâttâs äššitobdeeh já meccitärhisteijeeh aneh tuu lasseen huolâ tast, et miäcástem tábáhtuvá kilelávt já lavâlávt. Staatâ kuávluin kalga nuávdittiđ Meccietiket, ađai oovtâst soppum šiev meccijotteemtaavijd.

Äššitobdeeh mittoh miäcástem toin naalijn, et vistig váldoo huámášumán meccivaljenääli já páihálii miäcástem vaiguttâs meccivaaljan. Tast maŋa árvuštâlloo, et mon ennuv luuvijd puáhtá vyebdiđ iärásáid.

Meccihaldâttâs miäcástemkuávluh mulsâšudeh stuáruduvâs, enâduvâidis já lopeiävtuidis peeleest. Stuorrâ uási miäcástemenâmijn láá meccituálukuávlust, main sättih leđe meccituálupargoh meid miäcástemääigi.