Haʹŋǩǩeem- da kååʹmtem-määin

Täid määinaid liâ peiʹvvääm 19.11.2024.

Haʹŋǩǩeem- da kååʹmtem-määinain očndâʹvve puõʹtti nõõmtõõzz:

Tiʹllʼjeei lij ooumaž, kååʹtt håidd tiʹllʼjõõzz raajjmõõžž, leʹbe ouddmiârkkân vuästt lååʹv. Tiʹllʼjeei lij vaʹstteemvuõđâst rajjum tiʹlljõõzzâst, uvddum teâđain da tiʹllʼjõʹsse kuulli määusain de määinai meâldlain muttsin da kååmtummšin.
Tiʹllʼjõs lij vuästtmõš leʹbe vaʹrrjõs, koozz šâdd tiʹllʼjemnââmar. Õhttân tiʹlljõõzzâst vueiʹtte leeʹd mäŋgg lååʹv da/leʹbe måkkne neʹttkaaup pääiʹǩ vaʹrrjem leʹbe vuäʹsttem ouddaz da kääzzkõõzz.
Lååʹv õõʹnni lij tõt, ǩeäʹst lij vuõiggâdvuõtt ââʹnned lååʹv. Lååʹv õõʹnni nõmm lij mieʹrǩǩuum låppa. Tiʹllʼjeei âlgg iʹlmmted lååʹv õõʹnni teâđaid tiʹllʼjõõzz õhttvuõđâst. Teâđaid ǩiõttʼtâʹlle teâttsuejjčiõlǥtõõzz meâldlânji da tiʹllʼjeei lij vaʹstteemvuõđâst tõʹst, što looʹvi õõʹnni liâ teâđlaž täʹst. Vuâlla 16 -ekksai teâđai ruõkkmõʹšše taarbaš peâmmai tuõttmõõžž. Lååʹv õõʹnni da tiʹllʼjeei vuäitt leeʹd še seämma ooumaž.
Looʹvin õõlǥte pääiʹǩest B Meäʹcchalltõõzz kueʹllšeeʹllem-, meäccjem- da luâttooudaslooʹvid, lokku vääʹldǩâni kääʹnnlåʹddpââʹjjlooʹvid, koid ǩiõttʼtâʹlle pääiʹǩest C. Meäʹcchalltõõzz luâttvuejjamlooʹvid ǩiõttʼtâʹlle pääiʹǩest D–E.
Haʹŋǩǩeem- da kååʹmtem-määinain õõlǥte täid määinaid.

Meäʹcchalltõõzz meäccjem-, kueʹllšeeʹllem- da luâttvuejjamlååʹv liâ vaaldšemtuʹmmstõõǥǥ. Tuʹmmstõʹǩǩetååđvateʹmes vuäitt ooccâd vuõiǥummuš Meäʹcchalltõõzzâst 30 peeiʹv seʹst tõʹst, ǥu lij vuäǯǯam teâđ tuʹmmstõõǥǥâst. Vuõiǥeemõõlǥtõsčuäjtõõzz vuäǯǯ Meäʹcchalltõõzz Skååtrdemlooʹvi ääʹššlažkääzzkõõzzâst. Vuõiǥeemtuʹmmstõk lij määuslaž.

A. Aalmlaž määin

Tiʹllʼjeei vaʹsttad jiõčč tõʹst, što son lij ouddâl tiʹllʼjõõzz raajjam tobdstõõttâm

jiõčč låppa, kääzzkõʹsse leʹbe ouddsa kuulli dokumeeʹntid da määinaid
Eräluvat.fi-neʹttkääzzkõõzz ââʹnnem-määinaid da teâttsuejjčiõlǥtõʹsse de
täi haʹŋǩǩeem- da kååʹmtem-määinaid.

Jõs tiʹllʼjeei ij priim õõudpeäʹlnn peäggtum määinaid, son ij leäkku vueiʹtlvaž haʹŋǩǩeed looʹvid leʹbe jeeʹres ouddsid da kääzzkõõzzid, koid määin kueʹsǩǩe.

1. Tiʹllʼjõõzz raajjmõš da määinai priimmʼmõš

Tiʹllʼjõõzz vuäitt raajjâd Eräluvat.fi-neʹttkääzzkõõzzâst leʹbe Meäʹcchalltõõzz Skååtrdemlooʹvi ääʹššlažkääzzkõõzz pääiʹǩ.

Neʹttkääzzkõõzzâst tiʹllʼjeei lââʹzzat vuäʹsttem leʹbe vaʹrrjem looʹvid/ouddsid/kääzzkõõzzid vuäʹsttemkorjju. Siirdčõõttmen käšnna tiʹllʼjeei teudd vueʹššen jiijjâs teâđaid. Tän mâŋŋa tiʹllʼjeei teudd vueiʹtlvaid looʹvi õõʹnni teâđaid. Tiʹllʼjeei preemm määinaid piijeeʹl ruõss päikka “Priimam haʹŋǩǩeem- da kååʹmtem-määinaid” da raʹvvjeel tiʹllʼjõõzz. Čõõnni suåppmõš sâdd, ǥu tiʹllʼjeei lij mähssam määus.

Ääʹššlažkääzzkõõzz pääiʹǩ tiʹllʼjõõzz raajjmen ääʹššlaž âlgg uʹvdded tiʹllʼjõʹsse õõlǥtum teâđaid. Ääʹššlaž vuäǯǯ neʹttpååšta leʹbe taarbšeʹmmen põʹmmjen tiʹllʼjemraʹvvõõzz, looʹvi määinaid de mäʹhssemvuäʹppõõzzid.

Jõs tiʹllʼjemraajjmõš järran ooudâst čiõʹlǧǧummšest, tiʹllʼjeei âlgg leeʹd mââʹjeeǩâni õhttvuõđâst Meäʹcchalltõõzz Skååtrdemlooʹvi ääʹššlažkääzzkõʹsse.

2. Neʹttkääzzkõõzz tåimmʼmõʹšše kuulli rääjtõõzz

Meäʹcchalltõs ij täʹǩǩed, što ääʹššlaž tiʹllʼjõs oʹnnast. Tiʹllʼjõs ij oʹnnstõõv, jõs kååččmest åårrai ooudas poott seämma ääiʹj šõddi nuuʹbb tiʹllʼjõõzz diõtt. Riâžldõõǥǥ pâiʹlkuârmtummuš še vââjj tuejjeed tåimmamjeäʹđ, mõõn diõtt tiʹllʼjõs ij oʹnnstõõv. Jõs tiʹllʼjeei haaʹleem ouddaz lij vuäǯǯamnalla rääʹjtum mieʹrr, Meäʹcchalltõs ij täʹǩǩed, što tiʹllʼjeei vuäǯǯ lååʹv leʹbe jeeʹres ouddaz/kääzzkõõzz tõn voudda da äigga, koozz son vueʹššen ääiǥai lååʹv leʹbe jeeʹres ouddaz/kääzzkõõzz vuäʹstted leʹbe vaʹrrjed.

Meäʹcchalltõs ij leäkku vaʹstteemvuõđâst pääʹrtest, kååʹtt lij šõddâm ââʹnnemjeäʹđin, puåtklmin leʹbe jeeʹres teeknlaž võõʹjjin, kook vaiggâʹtte neʹttkääzzkõõzz âânnmõõžž. Mähssmõš da toʹben mäccmõš mååusat neʹttkääzzkõʹsse tuejjee kuälmad vueʹssbeäʹl kääzzkõõzzâst, koon tåimmʼmõõžžâst Meäʹcchalltõs ij vaʹstteemvuõđâst. Meäʹcchalltõs ij leäkku vaʹstteemvuõđâst tiʹllʼjeeja, jõs tiʹllʼjõs ij oʹnnast pannvuõiǥâs pääʹrtin.

Tiʹllʼjõõzz õhttvuõđâst tiʹllʼjeei lij vaʹstteemvuõđâst jiõčč tõʹst, što son vuäǯǯ neʹttkääzzkõõzzâst jiõcces tiʹllʼjõʹsse kuulli dokumeeʹntid mâʹt-a tiʹllʼjemravvõõzz, määinaid de vueiʹtlvaid jeeʹres låppa, ouddsa leʹbe kääzzkõʹsse kuulli teâđaid. Riâžldõk vuõlttad oʹnnstam tiʹllʼjõõzzâst raʹvvjemneʹttpååʹšt de taarblaid dokumeeʹntid tõn neʹttpååʹštaddrõʹsse, koon tiʹllʼjeei lij rekisterâʹsttmen leʹbe tiʹllʼjõõzz õhttvuõđâst ouddam. Tät neʹttpååʹštravvõs ij leäkku čõõnni suåppmõõžž šõddâm oudldõs, ǥu suåppmõš da tõn mäʹhssemõõlǥtõs liâ šõddâm juʹn ääiʹjben tiʹllʼjeei priimmʼmen da raʹvvjeʹmmen tiʹllʼjõõzz.

3. Tiʹllʼjõõzz mähssmõš

Eräluvat.fi-neʹttkääzzkõõzz pääiʹǩ rajjum tiʹllʼjõõzz âʹlǧǧe mäʹhssed neʹttkääzzkõõzzâst, Meäʹcchalltõõzz tuâjjtuejjeei jiâ vuõlttâd tiʹllʼjeeja laaskid, ravvõõzzid leʹbe ni måkam jeeʹres vaʹstteei teâđaid neʹttkääzzkõõzz pääiʹǩ rajjum tiʹllʼjõõzzâst.

Ääʹššlažkääzzkõõzz pääiʹǩ rajjum tiʹllʼjõõzz âʹlǧǧe mäʹhssed vuõss-sââʹjest mäʹhssemliiŋkin.

Tiʹllʼjeei lij vaʹstteemvuõđâst jiõčč tõʹst, što son mähss tiʹllʼjõõzzâs mieʹrrpeivva mõõneeʹst. Neʹttkääzzkõõzzâst leʹbe mäʹhssemliiŋkin mäʹhssem tiʹllʼjõõzz kåmmne automaattlânji, jõs tõid ij määuʹs mieʹrrpeivva mõõneeʹst. Tät ij kuõsk ooccmõõžžin ooccâm looʹvid.

Ooccmõõžžin ooccâm lååʹv âʹlǧǧe mäʹhssed vuõss-sââʹjest mäʹhssemliiŋkin. Ǩiõttʼtõõllmõõžžâst määusteʹmes lååʹppooccmõõžžâst vuõlttee tiʹllʼjeeja peʹrrjemââʹnteei laask, jõs määus jeäʹla vuäǯǯam mieʹrrpeivva mõõneeʹst.

Taarbšeʹmmen ääʹššlažkääzzkõõzz pääiʹǩ vuäitt raajjâd laaskin mäʹhssem tiʹllʼjõõzz. Laskktiʹllʼjõõzz jiâ kåmman automaattlânji.

4. Tiʹllʼjõõzz mottmõš leʹbe kååmtummuš

Tiʹllʼjõõzz mottmõš lij vueiʹtlvaž aainâs Meäʹcchalltõõzz Skååtrdemlooʹvi ääʹššlažkääzzkõõzz pääiʹǩ kå. lååʹv, ouddaz leʹbe kääzzkõõzz kuõskki määinai meâldlânji.

Määusteʹmes tiʹllʼjõõzz vuäitt kååʹmted ouddâl mieʹrrpeeiʹv ǩiõttʼtõõllâmkuulitää, jõs kå. lååʹv, ouddaz leʹbe kääzzkõõzz kuõskki määinain jiâ peäggat nuuʹbbnalla.

Ääʹššlažkääzzkõõzz pääiʹǩ tiʹllʼjum, mäʹhssemliiŋkin mäʹhssem tiʹllʼjõõzz vuäitt kååʹmted ääʹššlažkääzzkõõzz pääiʹǩ. Seämma kuâskk Eräluvat.fi-neʹttkääzzkõõzzâst jiõččkääzzkõssân rajjum tiʹllʼjõõzz. Kuhttuid vuäitt kååʹmted še neʹttkääzzkõõzz ääʹššlažtiil pääiʹǩ, jõs tiʹllʼjõs lij õhttuum åårrmen åårrai ääʹššlažtiʹlle. Jõs tiʹllʼjõõzz ij määuʹs, tõt kåmman automaattlânji mieʹrrpeeiʹv mâŋŋa (pl. ooccmõõžžin occum lååʹv).

Ääʹššlakääzzkõõzz pääiʹǩ tiʹllʼjum, laaskin mäʹhssem tiʹllʼjõõzz vuäitt kååʹmted aainâs Skååtrdemlooʹvi ääʹššlažkääzzkõõzz pääiʹǩ. Laask määuʹsǩâni kuâđđmõš ij leäkku kååmtummuš.

Mahssum tiʹllʼjõõzz kååmtummuš leʹbe mottmõš ij leäkku vueiʹtlvaž, jõs kå. lååʹv, ouddaz leʹbe kääzzkõõzz kuõskki määinain jiâ peäggat nuuʹbbnalla.

Meäʹcchalltõs ij maaccat vuâlla 30 eeuʹr teäʹǧǧmaacctõõzzid.

5. Määusvääʹlteei teâđ

Määusai vääʹltemkääzzkõõzz puuʹtʼteeʹjen da mäʹhssemkääzzkõõzz taʹrjjeeʹjen tåimmai Paytrail Oyj (2122839-7) õhttsažtuâjast lääʹddjânnam baaŋki da kredittstroiʹttlivuiʹm. Visa- leʹbe MasterCard-koortivuiʹm rajjum määusain Paytrail Oyj kuästtai määus vuäǯǯjen korttlaaskin da vääʹlat määus Meäʹcchalltõʹsse. Paytrail Oyj:st lij mäʹhssemstroiʹttel tåimmlååʹpp.

6. Åålǥasmetteemââʹntemvuõtt

Laask määuʹsǩâni kuâđđmõš ij leäkku kååmtummuš. Äävas vuäǯǯmõõžž liâ peʹrrjem- da åålǥasmetteemââʹnteei. Meäʹcchalltõõzzâst uvddum lääʹjj (234/2016) 24§:sa de valdia mäʹhssemvuâđđlääʹjj (150/1992) 11 §:sa nuäʹjest mähss Meäʹcchalltõõzz õõlmâsvuõiggâdvuõđ määusain vuäǯǯa peʹrrjed nõtta suudam- leʹbe tuʹmmstõõǥǥ tõn jäʹrstõõzzâst ǥu piiđi da määusai peʹrrjummšest åålǥasmetteemtååimain uvddum lääʹjjest (367/61) šiõttee.

7. Personteâđai rekisterâsttmõš, ǩiõttʼtõõllmõš da luõvtummuš

Eräluvat-kääzzkõõzzi teâttsuejjčiõlǥtõõzzid vuäitt lookkâd addrõõzzâst eraluvat.fi/sms/tietosuojaseloste leʹbe äännad tõn jiõcces sooiteeʹl Meäʹcchalltõõzz Skååtrdemlooʹvi kääzzkõsnââmra 020 69 2424.

B. Kueʹllšeeʹllem-, meäccjem- da luâttooudaslooʹvid kuõskki määin

Meäʹcchalltõs ij vuõss-sââʹjest vaʹstted meäccjem- da kueʹllšeeʹllempooddi teâđtummšest, ǥu ääʹššlaž lij õõlǥtum täʹrǩsted ääiʹjid veerǥlain teâđtemvuõllsin, leʹbe Lääʹddjânnam šiilkõõskõõzz riista.fi-seiddõõzzâst, kueʹllšeeʹllemrääʹjtõs kalastusrajoitus.fi- kääzzkõõzzâst leʹbe mädd- da meäʹcctäällministeria seeidain mmm.fi

1. Määusteʹmes tiʹllʼjõõzz kååmtummuš, mottmõš leʹbe serddmõš nuuʹbb ooumže

Määusteʹmes tiʹllʼjõõzz vuäitt kååʹmted ouddâl mieʹrrpeeiʹv ǩiõttʼtõõllâmkuulitää pääiʹǩest A 4 peäggtum naaʹlin.

Jõs määusteʹmes tiʹllʼjõõzz haaʹlad muʹtted, muttsest peʹrrje ǩiõttʼtõõllâmkuulid 15 euʹrred. Muttaz âʹlǧǧe raajjâd Meäʹcchalltõõzz Skååtrdemlooʹvi ääʹššlažkääzzkõõzz pääiʹǩ ouddâl tiʹllʼjõõzz mieʹrrpeeiʹv.

Mieʹrrpeeiʹv mâŋŋa määusteʹmes tiʹllʼjõõzz kååmtummuš, mottmõš leʹbe lååʹv serddmõš nuuʹbb ooumže ij leäkku vueiʹtlvaž.

2. Mahssum tiʹllʼjõõzz leʹbe lååʹv kååmtummuš, mottmõš leʹbe serddmõš nuuʹbb ooumže

Mahssum tiʹllʼjõõzz leʹbe tõʹst åårrai lååʹv ij vueiʹt seʹrdded nuuʹbb ooumže, nuuʹbb ääiʹjpoʹdde leʹbe nuuʹbb lååʹppvoudda.

Tiõttum vueʹjjest tiʹllʼjeeʹjest lij vuõiggâdvuõtt kååʹmted lååʹpp da vuäǯǯad mååusat tõʹst mahssum hâʹdd. Uuʹccmõs maacctem teäʹǧǧmieʹrr lij 30 euʹrred.

Jiijjâs lååʹv vuäitt kååʹmted, jõs tiʹllʼjeei jiõčč, lååʹv õõʹnni leʹbe siʹjjid õõldâs ooumaž puâccai lossânji, jåudd tuõđâs pärtta leʹbe jäämm. Õõldâs ooumžen âʹnne pieʹllkueiʹmm, ääʹvpieʹllkueiʹmm, päärna, puärraz, vuõpp da vueʹn, vueʹbbid da viiʹlljid, päärnaipäärna da ääkk da ääiʹj. Lååʹv vuäitt kååʹmted še, jõs tiʹllʼjeeja leʹbe lååʹv õõʹnnʼja šâdd jeeʹres krõõttai da tuõđâs päʹrtt. Jeeʹres krõõttai da tuõđâs päʹrtt lij ouddmiârkkân miârkteei päʹrtt jeällmõʹšše, mâʹt-a põõrt puâllmõš. Tuõđâs pärttan jiâ ǩiõčč ouddmiârkkân pieʹnne puâccjummuš leʹbe jäämmʼmõõžž jiâ-ga aaut muärrjummuš.

Kååmtummuš âlgg raajjâd ouddâl lååʹppääiʹj älggmõõžž. Jõs ooudâst peäggtum vieʹrin šõddi lååʹv kååmtummuš tuejjad gu viõǥǥâståårrâmpodd lij juʹn älggam, jiâ lååʹv hââʹdd koʹrvved mååusat.

Tiʹllʼjeei âlgg iʹlmmted kååmtummšest mââʹjeeǩâni Meäʹcchalltõõzz Skååtrdemlooʹvi ääʹššlažkääzzkõʹsse. Tiʹllʼjeei âlgg pâʹstted čuäʹjted lååʹv ââʹnnem cõgldõs ååsklaž čiõlǥtõõzzin nuʹtt sõrgg ǥu lij vueiʹtlvaž. Cõgldõs âlgg čuäʹjted mââimõssân kueiʹt neäʹttel ǩeeʹjjest tõn očndõõttmõõžžâst, krååʹma jõs tän mieʹrrääiʹj jääʹǩǩtummuš lij tiʹllʼjeeja leeiǥas väʹǯǯlõs. Ååsklaž čiõlǥtõssân laʹsǩǩee dåhttartuõđštõs, tiõrvâsvuõtthoiʹddjeei tuõđštõs, pååʹlestuʹtǩǩeempåʹrddǩeʹrjj leʹbe ååsktõsõutstõõzz ciâlkâlm. Tuõđštõssân preʹmme še tuâjjuʹvddi tuõđštõs pååđääiʹj serddmõõžžâst, tuõđštõs mättʼtõõttmõõžž alttummšest leʹbe ǩeärddeem sääldathaʹrjjtõõzzâst. Tuõđštõõzzâst âlgg leeʹd tuõđštõõzz uʹvddi õhttvuõtt-teâđ. Čiõlǥtõs âlgg tååimted Meäʹcchalltõʹsse addrõʹsse Meäʹcchalltõs Eräpalvelut, PL 81, 90101 OULU leʹbe neʹttpååšta addrõʹsse eraluvat@metsa.fi. Čiõlǥtõõzzâst âlgg lââʹssen peäggted, koon lååʹv kååmtummuš kuâskk (lååʹppnââmar).

3. Kueʹllhåiddam-määus

Kueʹllhåiddam-määusaid suåvtâʹlle pääiʹǩest B 1 ja B 2 peäggtum lååʹppmääinaid tõin järrnummšin, što kueʹllhåiddam-määusaid kuõskki muttsin jiâ peʹrre ǩiõttʼtõõllâmkuulid.

Kueʹllšeeʹllemlääiʹj 81§:sa mieʹldd Meäʹcchalltõõzzâst ij jeärbuž veäʹrtää leäkku õõlǥtemvuõtt tååimted ođđ tuõđštõõzz kueʹllhåiddam-määus mähssmõõžžâst, jõs kueʹllšiiʹlli lij läppam ääiʹjben vuäǯǯam tuõđštõõzzâs.

Meäʹcchalltõõzzâst ij jeärbuž veäʹrtää leäkku õõlǥtemvuõtt maaccted vââǥǥlânji mahssum kueʹllhåiddam-määus.

Jõs tiʹllʼjeei lij mähssam kueʹllhåiddameeʹǩǩmääus kueiʹt vuâra, leiʹǧǧ määus vueiʹtte seʹrdded tiʹllʼjeei iʹlmmtem nuuʹbb oummu nõʹmme. Jõs leeiǥas mahssum kueʹllhåiddam-määus serddmõš nuuʹbb oummu nõʹmme ij leäkku vueiʹtlvaž, vueiʹtte leiʹǧǧ määus maaccted. Ääʹššlaž âlgg leeʹd õhttvuõđâst Meäʹcchalltõõzz Skååtrdemlooʹvi ääʹššlažkääzzkõʹsse mââimõssân 90 suutk seʹst määus mähssmõõžžâst, što maacctõs leʹbe muuttâs lij vueiʹtlvaž.

Jõs vuäʹnkõsääiʹj piʹštti kueʹllhåiddam-mähss lij mahssum kueiʹt vuâra, määus vueiʹtte seʹrdded nuuʹbb ooumže. Muuttâs âlgg raajjâd ouddâl lååʹppääiʹj älggmõõžž.

4. Vuäggamlååʹv kååʹmtummuš pannvueʹjjest

Jõs čääʹcc pakkvuõtt kueʹllšeeʹllemvuuʹdest pâjjan pâʹjjel 21 čeäkkaz, Meäʹcchalltõs vuäitt mõõn-ne ääiǥaž kõõskâʹtted lååʹppkaaupšummuž voudda luândlaž luõsskueʹllvuâđai staanmõššân. Lååʹppkaaupšummuš kõõskâʹtte pâi tiõttum ääiʹjpoʹdde, mõõn mâŋŋa vueʹjj arvvlâʹstte oʹđđest.

Jõs vuäggamlååʹpp lij juʹn haʹŋǩǩuum kõõččmest åårrai ääiʹjpoʹdde, tiʹllʼjeei vuäitt:

kååʹmted mahssum lååʹv võõps da vuäǯǯad tieʹǧǧid mååusat. Kååmtummuš âlgg tuejjeed ouddâl lååʹv viõʹǩǩe pueʹttem älggmõõžž. Meäʹcchalltõõzz Skååtrdemlooʹvi ääʹššlažkääzzkõʹsse. Pannvueʹjjest da tõid kuulli teäʹǧǧmaacctõõzzin saaǥǥte pâi jeäʹrben Eräluvat.fi-kääzzkõõzzâst.
Kueʹllšeellmõš mahssum looʹvin nuʹtt haaʹleʹmmen. Tän jiâ kuuitâǥ siâzztõõl. Meäʹcchalltõs ij vueiʹt õõutpeällsânji muʹtted leʹbe kååʹmted kueʹllšeeʹllemlååʹv nõtta lååʹv tiʹllʼjeei tuõttmõõžž.

5. Meäccjemlååʹv kååmtummuš meäccjempooddi šeâttmõõžž diõtt

Meäʹcchalltõs kaaupaš meäccjemlooʹvid ouddâl ǥu mädd- da meäʹcctäällministeria lij ravvääm meäʹcckääʹnnlooʹddi meäccjempooddi kuõskki šiõttõõzz puõʹtti meäccjemekka. Čõõuč lååʹppkaaupšemneäʹttlest kaaupšemnalla šiõttuum kääʹnnlååʹddlååʹv vuâđđee mädd- da meäʹcctäällministeria šiõtteem-meâlddõʹsse meäccjempooddin.

Jõs meäccjempooddid jeäʹla ravvääm ouddâl lååʹppkaaupšem älggmõõžž, âlgg ääʹššlaž vuõss-sââʹjest tobdstõõttâd Eräluvat.fi-kääzzkõõzzâst čõõđtum šiõtteem-meâlddõʹsse vuâđđuum meäccjempooddid. Meäʹcchalltõs kååʹmat ouddâl meäʹcckääʹnnlooʹddi meäccjempooddid kuõskki šiõttõõzz raʹvvjummuš vuåsttum kääʹnnlåʹddlooʹvid pâi tõn määinast, što raʹvvjum šiõttõs ij leäkku vueiʹtlvaž ni koon meäʹcckääʹnnlåʹddšlaaj meäccjed vuåsttum lååʹv viõǥǥâståårrâmäiʹǧǧen. Täin pannvueʹjjin da tõid kuulli teäʹǧǧmaacctummšin saaǥǥte pâi jeäʹrben Eräluvat.fi-kääzzkõõzzâst

6. Šiil iʹlmmtummuš

Lååʹv õõʹnni lij õõlǥtum iʹlmmted vuäǯǯum šiil meäʹrid tâʹlles meäccjemääiʹj puuʹttmen (meäccjemlââʹǩǩ 46 §). Šiilteâđaid âlgg iʹlmmted vuõss-sââʹjest neʹtt addrõõzzâst saalispalaute.eraluvat.fi.

Kueʹllšeeʹllem šiilmaacctõõzz ouʹdde omakala.fi -kääzzkõõzz pääiʹǩ de še måttmešt jeäʹrben lååʹppvuuʹd lååʹppmääinast čiõlǥtum vueʹjjin.

C. Kääʹnnlåʹddpââʹjjlooʹvid kuõskki määin

1. Määusteʹmes kääʹnnlåʹddpââʹjjlååʹv kååmtummuš leʹbe mottmõš

Ǩiõttʼtõõlteʹmes kääʹnnlåʹddpââʹjjlååʹppooccmõõzz vuäittkååʹmted leʹbe tõn vuäitt muʹtted ooccâmpoddan Eräluvat.fi-neʹttkääzzkõõzz pääiʹǩ.

Miõttum määusteʹmes kääʹnnlåʹddpââʹjjlååʹv vuäitt haaʹleʹmmen kååʹmted ouddâl mieʹrrpeeiʹv maacctemkuulitää. Kååmtummuš âlgg raajjâd da leeʹd õhttvuõđâst Meäʹcchalltõõzz Skååtrdemlooʹvi ääʹššlažkääzzkõʹsse. Mieʹrrpeeiʹv mâŋŋa kääʹnnlåʹddpââʹjjlååʹv ij teänab vueiʹt kååʹmted da lååʹpp âlgg mäʹhssed tiuddmieʹrren. Miõttum lååʹv määuʹskâni kuâđđmõš ij leäkku kååmtummuš. Miõttum kääʹnnlåʹddpââʹjjlååʹv ij vueiʹt muʹtted leʹbe seʹrdded nuuʹbb ooumže. .

2. Mahssum kääʹnnlåʹddpââʹjjlååʹv kååmtummuš

Vuõss-sâjjsânji mahssum kääʹnnlåʹddpââʹjjlååʹv käämtummuš ij leäkku vueiʹtlvaž.

Tiõttum vueʹjjin mahssum kääʹnnlåʹddpââʹjjlååʹv kååmtummuš lij vueiʹtlvaž da tiʹllʼjeeʹjest lij vuõiggâdvuõtt vuäǯǯad mååusat tõʹst mahssum hâʹdd. Lååʹv vuäitt kååʹmted, lååʹv vuäǯǯai jiõčč leʹbe suʹnne õõldâs ooumaž jåudd tuõđâs pärtta leʹbe jäämm. Õõldâs ooumžen âʹnne pieʹllkueiʹmm, ääʹvpieʹllkueiʹmm, päärna, puärraz, vuõpp da vueʹn, vueʹbbid da viiʹlljid, päärnaipäärna da ääkk da ääiʹj. Lååʹv vuäitt kååʹmted še, jõs tiʹllʼjeeja leʹbe lååʹv õõʹnnʼja šâdd jeeʹres krõõttai da tuõđâs päʹrtt. Jeeʹres krõõttai da tuõđâs päʹrtt lij ouddmiârkkân miârkteei päʹrtt jeällmõʹšše, mâʹt-a põõrt puâllmõš. Tuõđâs pärttan jiâ ǩiõčč ouddmiârkkân pieʹnne puâccjummuš leʹbe jäämmʼmõõžž jiâ-ga aaut muärrjummuš.

Kååmtummuš âlgg raajjâd ouddâl lååʹppääiʹj älggmõõžž. Jõs ooudâst peäggtum vieʹrin šõddi lååʹv kååmtummuš tuejjad gu viõǥǥâståårrâmpodd lij juʹn älggam (1.8.) jiâ lååʹv hââʹdd koʹrvved mååusat.

Tiʹllʼjeei âlgg iʹlmmted kååmtummšest mââʹjeeǩâni Meäʹcchalltõõzz Skååtrdemlooʹvi ääʹššlažkääzzkõʹsse. Tiʹllʼjeei âlgg pâʹstted čuäʹjted lååʹv ââʹnnem cõgldõs ååsklaž čiõlǥtõõzzin nuʹtt sõrgg ǥu lij vueiʹtlvaž. Cõgldõs âlgg čuäʹjted mââimõssân kueiʹt neäʹttel ǩeeʹjjest tõn očndõõttmõõžžâst, krååʹma jõs tän mieʹrrääiʹj jääʹǩǩtummuš lij tiʹllʼjeeja leeiǥas väʹǯǯlõs. Ååsklaž čiõlǥtõssân laʹsǩǩee dåhttartuõđštõs, tiõrvâsvuõtthoiʹddjeei tuõđštõs, pååʹlestuʹtǩǩeempåʹrddǩeeʹrj leʹbe ååsktõsõutstõõzz ciâlkâlm. Čiõlǥtõs âlgg tååimted Meäʹcchalltõõzz addrõʹsse MetsähallitusEräpalvelut, PL 81, 90101 OULU leʹbe neʹttpååšta addrõʹsse eraluvat@metsa.fi. Čiõlǥtõõzzâst âlgg lââʹssen peäggted, koon lååʹv kååmtummuš kuâskk (lååʹppnââmar).

D. Luâttvuejjamlååʹv kuõskki määin

1. Määusteʹmes ǩeäinlååʹv kååmtummuš

Määusteʹmes tiʹllʼjõõzz vuäitt kååʹmted ouddâl mieʹrrpeeiʹv ǩiõttʼtõõllâmkuulitää pääiʹǩest A 4 .

2. Mahssum ǩeäinlååʹv kååmtummuš

Ǩeäinlååʹv tiʹllʼjeeʹjest lij vuõiggâdvuõtt kååʹmted mahssum lååʹpp da vuäǯǯad koʹrvvõs lååʹppmääusast puõʹtti määinain.

Jõs kååmtummuš rääjj ouddâl ǥu lååʹv viõǥǥâståårrâmäiʹǧǧ lij älggam, tiʹllʼjeeja koʹrvvee lååʹv hââʹdd.
Jõs kååmtummuš rääjj eman ǥu lååʹpp lij juʹn puättam viõʹǩǩe, määus jiâ maaccad.

Kååmtummuš âlgg raajjâd vuõltteeʹl neʹttpååʹšt addrõʹsse maastoliikenneluvat@metsa.fi. Uuʹccmõs maacctem teäʹǧǧmieʹrr lij 30 euʹrred.

3. Ǩeäinlååʹv mottmõš leʹbe serddmõš nuuʹbb oummu nõʹmme

Ǩeäinlååʹv ij leäkku vueiʹtlvaž muʹtted leʹbe seʹrdded nuuʹbb oummu nõʹmme. Ǩeäinlååʹpp âlgg kååʹmted pääiʹǩ D 1 da D 2 kååʹmtem-määinai meâldlânji, koon mâŋŋa ǩeäinlååʹv vuäitt vuäʹstted oʹđđest muttum teâđain.

4. Ǩiõttʼtõõlteʹmes motorǩeâlkkvuâjjamǩeäinai åålǥpeällsai luâttvuejjamlååʹppooccmõõžž kååmtummuš

Motorǩeâlkkk-ǩeäinai åålǥpeällsõʹžže occum luâttvuejjamlååʹv vueiʹtte kååʹmted, jõs tiʹllʼjeei kååʹmat lååʹv ouddâl ǥu Meäʹcchalltõs lij tuejjääm ooccmõõžž kuõskki luâttvuejjamlååʹpptuʹmmstõõǥǥ (miõđsaž leʹbe ǩiõldlaž). Kååmtummuš âlgg tuejjeed vuõltteeʹl neʹttpååʹšt addrõʹsse maastoliikenneluvat@metsa.fi. Lååʹppooccmõõžž kååʹmtem ǩiõttʼtõõllmõõžžâst peʹrrje Pirrõsministeria šiõttõõzz (96/2024) 7 §:sa nuäʹjest rajjum tuâjjmeäʹr vaʹstteei määus.

5. Meäʹcchalltõõzz ǩiõttʼtõõllâm motorǩeâlkk-ǩeäinai åålǥpeällsaž luâttvuejjamlååʹv kååmtummuš pâiʹlviõǥǥsaž cõgldõõzz diõtt

Vuõss-sââʹjest Meäʹcchalltõõzz uʹvddem motorǩeâlkk-ǩeäinai åålǥpeällsaž luâttvuejjamlååʹpptuʹmmstõõǥǥ (juätkast lååʹpp) ij vueiʹt kååʹmted.

Lååʹv vuäitt kuuitâǥ kååʹmted, jõs tiʹllʼjeei jiõčč, lååʹv õõʹnni leʹbe siʹjjid õõldâs ooumaž puâccai lossânji, jåudd tuõđâs pärtta leʹbe jäämm. Õõldâs ooumžen âʹnne pieʹllkueiʹmm, ääʹvpieʹllkueiʹmm, päärna, puärraz, vuõpp da vueʹn, vueʹbbid da viiʹlljid, päärnaipäärna da ääkk da ääiʹj. Lååʹv vuäitt kååʹmted še, jõs tiʹllʼjeeja leʹbe lååʹv õõʹnnʼja šâdd jeeʹres krõõttai da tuõđâs päʹrtt. Jeeʹres krõõttai da tuõđâs päʹrtt lij ouddmiârkkân miârkteei päʹrtt jeällmõʹšše, mâʹt-a põõrt puâllmõš. Tuõđâs pärttan jiâ ǩiõčč ouddmiârkkân pieʹnne puâccjummuš leʹbe jäämmʼmõõžž jiâ-ga aaut muärrjummuš.

Tiʹllʼjeei (leʹbe tiʹllʼjeei peäʹlest äʹššõtti) âlgg iʹlmmted kååmtummšest mââʹjeeǩâni vuõlteeʹl neʹttpååʹšt addrõʹsse maastoliikenneluvat@metsa.fi. Son âlgg pâʹstted čuäʹjted lååʹv ââʹnnem cõgldõs ååsklaž čiõlǥtõõzzin nuʹtt sõrgg ǥu lij vueiʹtlvaž. Cõgldõs âlgg čuäʹjted mââimõssân kueiʹt neäʹttel ǩeeʹjjest tõn očndõõttmõõžžâst, Ååsklaž čiõlǥtõssân laʹsǩǩee dåhttartuõđštõs, tiõrvâsvuõtthoiʹddjeei tuõđštõs, pååʹlestuʹtǩǩeempåʹrddǩeeʹrj leʹbe ååsktõsõutstõõzz ciâlkâlm. Čiõlǥtõs âlgg tååimted Meäʹcchalltõõzz addrõʹsse Metsähallitus Eräpalvelut, PL 81, 90101 OULU. Čiõlǥtõõzzâst âlgg lââʹzzen peäggted, koon lååʹv kååmtummuš kuâskk [lååʹppnââmar).

Priimmum vieʹrren kååʹmtum lååʹvest maaccte mååusat tõʹst mahssum hâʹdd. Ooccmõõžž kååʹmtem leʹbe jeeʹres ooccjest puõʹtti veäʹr diõtt kååʹmtum lååʹv ǩiõttʼtõõllmõõžžâst peʹrrje pirrõsministeria šiõttõõzz (96/2024) 7 §:sa nuäʹjest tuejjuum tuâjjmeäʹr vaʹstteei vuässõs määusast, jeäʹrbin laaskin. Uuʹccmõs maacctem teäʹǧǧmieʹrr lij 30 euʹrred, Lååʹpphââʹdd jiâ koʹrvved mååusat jiâ-ga lååʹv vââʹjet nuuʹbb ooumže, jõs ooudâst peäggtum vieʹrin šõddi kååmtummuš rääjj eman lååʹv viõǥǥâståårrâmpoodd.

6. Meäʹcchalltõõzz ǩiõttʼtõõllâm motorǩeâlkk-ǩeäinai åålǥpeällsaž luâttvuejjamlååʹv kååmtummuš nõtta jeärbuž veäʹr

Meäʹcchalltõõzz uʹvddem motorǩeâlkkk-ǩeäinai åålǥpeällsaž luâttvuejjamlååʹpptuʹmmstõõǥǥ (miõđsaž leʹbe ǩiõldlaž) ij leäkku vueiʹtlvaž kååʹmted nõtta pääiʹǩest D 5 peäggtum jeärbuz veäʹr.

Lååʹpptuʹmmstõõǥǥ määuʹsǩâni kuâđđmõš ij leäkku kååmtummuš.

7. Meäʹcchalltõõzz ǩiõttʼtõõllâm motorǩeâlkk-ǩeäinai åålǥpeällsaž n luâttvuejjamlååʹv mottmõš leʹbe serddmõš nuuʹbb ooumže nõtta jeärbuž veäʹr

Meäʹcchalltõõzz uʹvddem motorǩeâlkkk-ǩeäinai åålǥpeällsaž luâttvuejjamlååʹpptuʹmmstõõǥǥ (miõđsaž leʹbe ǩiõldlaž) ij leäkku vueiʹtlvaž muʹtted. Lååʹv ij vueiʹt še ni seʹrdded nuuʹbb ooumže.

E. Luâttvuejjamlååʹv põõrǥâs- da äʹrttel-looʹvid kuõskki määin

1. Ǩiõttʼtõõlteʹmes põõrǥâs- leʹbe äʹrttel-lååʹv kååmtummuš

Põõrǥâs- leʹbe äʹrttel-lååʹv vueiʹtte kååʹmted, jõs tiʹllʼjeei kååʹmat lååʹv ouddâl ǥu Meäʹcchalltõs lij tuejjääm ooccmõõžž kuõskki luâttvuejjamlååʹpptuʹmmstõõǥǥ (miõđsaž leʹbe ǩiõldlaž). Kååmtummuš âlgg tuejjeed vuõltteeʹl neʹttpååʹšt addrõʹsse maastoliikenneluvat@metsa.fi. Lååʹppooccmõõžž kååʹmtem ǩiõttʼtõõllmõõžžâst peʹrrje pirrõsministeria šiõttõõzz (96/2024) 7 §:sa nuäʹjest rajjum tuâjjmeäʹr vaʹstteei määus.

Luâttvuejjamsafarid raajji põõrǥâs iʹlmmat safaripuõttlaž luâttvuejjamlooʹvid jiõččnõʹžžen.. Safaripuõttlaž luâttvuejjamlååʹv ij leäkku vueiʹtlvaž kååʹmted lååʹv iʹlmmtem mâŋŋa.

2. Meäʹcchalltõõzz ǩiõttʼtõõllâm põõrǥâs- da äʹrttel-lååʹv kååmtummuš

Põrggi- leʹbe äʹrttel-lååʹv ij leäkku vueiʹtlvaž kååʹmted, ǥu Meäʹcchalltõs lij ouddam täid kuõskki luâttvuejjamlååʹpptuʹmmstõõǥǥ (miõđsaž leʹbe ǩiõldlaž).

Lååʹpptuʹmmstõõǥǥ määuʹsǩâni kuâđđmõš ij leäkku kååmtummuš..

3. Meäʹcchalltõõzz ǩiõttʼtõõllâm põõrǥâs- da äʹrttel-lååʹv mottmõš leʹbe serddmõš nuuʹbb oummu nõʹmme

Meäʹcchalltõõzz uʹvddem põõrǥâš- leʹbe ärttel-lååʹpptuʹmmstõõǥǥ (juätkast luâttvuejjamlååʹpp/lååʹpp) ij vueiʹt muʹtted leʹbe seʹrdded nuuʹbb oummu nõʹmme.

Sararipuõttlaž luâttvuejjamlååʹv ij leäkku vueiʹtlvaž muʹtted lååʹv iʹlmmtem mâŋŋa.

F. Ǩeâmpaid da jeeʹres vaʹrrjem pääiʹǩid kuõskki määin

Ǩeâmpai da jeeʹres vaʹrrjem paaiʹǩi vueʹzzest tiʹllʼjeei preemm täi määinai pääiʹǩ A. Aalmlaž määin de addrõõzzâst eraluvat.fi/tuvat/tupavaraajan-tietopankki/tupien-varausehdot käunnʼje vaʹrrjem-määin.