Ââʹnnem-määin
Täid määinaid liâ peiʹvvääm 19.11.2024.
Kääzzkõõzz čiõlǥtõs
Täid määinaid suåvtâʹlle Meäʹcchalltõõzz puuʹttem da âʹlnn ââʹnnem Eräluvat.fi-neʹttkääzzkõõzz âânnmõʹšše. Eräluvat.fi-neʹttkääzzkõõzz (mâʹŋŋlubust “Kääzzkõs”) nårrai luâttjååttmõʹšše kuulli teâđ siiʹsǩeei seeidain, kaaupšem/miõttmõõžžin ouddsin de mobiilsuåvldõõzzâst. Kääzzkõõzzâst vuäitt haʹŋǩǩeed Meäʹcchalltõõzz kueʹllšeeʹllem-, meäccjem-, luâttvuejjam-, luândvuuʹd-, da luâttooudaslooʹvid, mäʹhssed valdia kueʹllhåiddam-määus da vaʹrrjed ǩeâmp. Jiõčč kääzzkõõzz âânnmõš lij määusteʹmes. Tiõttum Kääzzkõʹsse kuulli vueʹzzi âânnmõš, mâʹt-a lååʹv kuâđđmõš vaʹrrjõʹsse, oudldâstt rekisterâsttmõõžž.
Ââʹneel Kääzzkõõzz õõʹnni ååskat tobdstõõttmõõžžâs täid ââʹnnem-määinaid de teâttsuejjčiõlǥtõʹsse da čõõnââtt jäʹǩǩted tõid. Lââʹssen Kääzzkõõzzâst liâ jeärbuž ooudaspuõttlaž määin, mâʹt-a lååʹppouddsi määin, dehaʹŋǩǩeem- da kååʹmtem-määin, koid Kääzzkõõzz õõʹnni ååskat tobdstõõttmõõžžâs da koid son preemm jiijjâs čõnnõõttmõõžžân ouddsid tiʹllʼjeʹmmen.
Õõʹnni čõnnââtt ââʹnned Kääzzkõõzz lääʹjj da šiõǥǥ vueʹjj meâldlânji.
Ââʹnnemvuõiggâdvuõtt kääzzkõõzzâst čõõđtem aunstõʹsse
Kääzzkõõzz vuäǯǯ ââʹnned pâi jiõččnõʹžže, ij kaauplaž miârktõʹsse. Õõʹnni ij vuäǯǯ jeeʹresnalla äuʹǩǩeed Kääzzkõõzz leʹbe tõn vueʹzzid nõtta Meäʹcchalltõõzz ǩeerjlaž lååʹv/suåppmõõžž. Kääzzkõõzz puk vuõiggâdvuõđ, raajjivuõiggâdvuõđ mieʹldd looǥǥeeʹn, koʹlle Meäʹcchalltõʹsse da /leʹbe tõn õhttsažtuâjjtuâjjlaid. Kääzzkõs puki vueʹzzineez lij suejjuum raajjivuõiggâdvuõđin raajjivuõiggâdvuõttlääʹjji meâldlânji.
Kääzzkõõzz ââʹnnemrääʹjtõõzz
Vuâlla 13-ekksast leʹbe jeeʹres väʹjjvälddsaž õõʹnnʼjest iʹlla vuõiggâdvuõtt tuejjeed tiʹllʼjõõzzid leʹbe suåppmõõžžid Kääzzkõõzzâst nõtta peâmmai tuõttmõõžž.
Rekisterâsttmõš
Õõʹnni oudd viõǥǥâst åårrai neʹttpååʹštaddrõõzz da meäʹrtââll peittsääʹn ääʹššlažtiil raajjâm õhttvuõđâst. Õõʹnni vaʹsttad pukin neʹttpååʹštaddrõzstes da peittsaaʹnin tuejjuum âânnmõõžžâst da ââʹn huõl jiõčč tõʹst, štõ peittsääʹnn pââšš pâi jiijjâs teâđast. Õõʹnni vuäitt jiõčč muʹtted Kääzzkõõzzâst åårrai ääʹššlažteâđaid ääʹššlažtiiʹles pääiʹǩ leʹbe leeʹd õhttvuõđâst Skååtrdemlooʹvi ääʹššlažkääzzkõʹsse teʹl. 020692424 leʹbe eraluvat@metsa.fi.
Personteâđai ǩiõttʼtõõllmõš
Õõʹnnʼji personteâđai ǩiõttʼtõõlmõš lij čiõlǥtum teâttsuejjčiõlǥtõõzzâst: www.eraluvat.fi/sms/tietosuojaseloste.
Jeävstõõzzi âânnmõš
Kääzzkõõzz jeävstõõzzin lij peäggtum teâttsuejjčiõlǥtõõzzâst: www. eraluvat.fi/sms/tietosuojaseloste.
Teâttstaan mähssjååttlõõǥǥâst
Kääzzkõõzzâst âʹnne Suomi.fi-määusaid. Baŋkkõhttvuõtt- leʹbe kredittkortt-teâđaid jiâ ruõkk ni mõõn määʹttest Meäʹcchalltõõzz serveera, ǥu mähssmõʹšše kuulli teâđaid vääʹltummuš mâânn mähssvääʹlteei (Paytrail) ââʹnnemõhttõõzz pääiʹǩ.
Kääzzkõõzz puuʹttummuš da âʹlnn âânnmõš
Meäʹcchalltõõzzâst lij vuõiggâdvuõtt pueʹreed da pukin vueʹjjin muʹtted Kääzzkõõzz siiskâž da raajõs, tõn ooudas- da teâttvuâđđvâʹlljõõzzid, prograammid, neävvaid, tååimtem siiskâž, kääzzkõsääiʹjid de jeeʹres Kääzzkõõzz vueʹzzid. Meäʹcchalltõs põrgg teâđted Kääzzkõõzzâst šõddi, õõʹnni määinast vääžnjummuš muttsin de puåtklmin õõʹnnʼja ouddǩiõʹtte Kääzzkõõzz vääʹltummšin leʹbe jeeʹres suåvlaž ǩiõččum vueʹjjin. Muttaz puäʹtte viõʹǩǩe tâʹlles, ǥu tõk liâ čõõđtum.
Kääzzkõõzzâst vueiʹtte leeʹd liiŋk kuälmad vueʹsspieʹli vuäʹmstem leʹbe âʹlnn ââʹnnem seeidaid. Siirdčõõttmen liŋkkõttum seeidaid priimak, što seeid jeäʹla Meäʹcchalltõõzz vaaldšummšest. Meäʹcchalltõs ij vaʹsttad Kääzzkõõzzâs pääiʹǩ jeeʹres tåimmjeeʹji kääzzkõõzzi seeidai siiskõõzzin leʹbe tåimmʼmõõžžin ni måkam vueʹzzest.
Kääzzkõs lij vuõss-sââʹjest ââʹnnemnalla 24 čiâssad suutkast. Meäʹcchalltõs ij staan, što Kääzzkõs tåimmai ââʹnnempuåtklmitää leʹbe vââǥǥlânji. Meäʹcchalltõs ij vaʹsttad riâžldõõǥǥ pâʹjjel kueʹrmtummšest šõddi tåimmamjieʹttest. Meäʹcchalltõõzzâst lij kuäʹss täättas vuõiggâdvuõtt väʹldded Kääzzkõs leʹbe tõn vueʹzz mõõn-ne äigga meädda âânnmõõžžâst huâl, neävvšiõtteem, riâžldõõǥǥ leigga kueʹrmeem leʹbe jeeʹres viâltʼteʹmes veäʹr diõtt.
Meäʹcchalltõõzzâst lij pâi haaʹleʹmmen vuõiggâdvuõtt looppted Kääzzkõõzz taʹrjjummuš vooʹps leʹbe pieʹǩǩen. Meäʹcchalltõs iʹlmmat loopptummšest ouddǩiõʹtte Kääzzkõõzz vääʹltem leʹbe jeeʹres suåvlõʹžžen ǩiõččum vueʹjjin.
Päʹrttkoʹrvveemõõlǥtemvuõtt
Meäʹcchalltõs ij vaʹsttad teeknlaž võõʹjji, huâlai leʹbe šiõtteemtuâjai šõddeem puåtklmin, teâttjååttlõkjieʹttin ij-ga tõi vueiʹtlvõʹžžen šõddi teâđ mâŋŋnummšest, motstõõvvâm leʹbe läppjummšest da vueiʹtlvain õõʹnnʼja vuõiʹǧǧest šõddi leʹbe pannvuõiǥâs paaʹrtin.
Suåvteei lääʹǩǩ
Kääzzkõõzz âânnmõʹšše da ââʹnnem-määinai tuʹlǩǩõʹsse suåvtâʹlle Lääʹddjânnam lääʹjj.
Ââʹnnemvueʹjji viõʹǩǩepuättmõš da mottmõš
Ââʹnnem-määin puäʹtte viõʹǩǩe määinai aalǥâst iʹlmmtum peiʹvveempooddâst da liâ viõǥǥâst põõššinalla. Meäʹcchalltõõzzâst lij vuõiggâdvuõtt muʹtted ââʹnnem-määinaid iʹlmmteel ođđ ââʹnnem-määinain Kääzzkõõzzâst.
Täi ââʹnnem-määinai peiʹvvummšin ij leäkku vaikktõs ouddâl peiʹvveem rajjum tiʹllʼjõõzzi määinaid. Täid tiʹllʼjõõzzid suåvtâʹlle suåppmõõžž raajjâmpoodd viõǥǥâst åårrai määinaid.
Rekisterâsttmõʹšše vuâđđeei âânnmõõžž loopptummuš
Kuhttu vueʹsspieʹll vueiʹtte kuäʹss täättas čåuʹddõõttâd õõʹnni rekisterâsttmõõžž. Õõʹnni čåuddââtt rekisterâsttmõõžžâs ââʹneel Meäʹcchalltõõzz piijjâd meädda ääʹššlažtiiʹles. Ââʹnnemvuõiggâdvuõđ loopptummuš ij uuʹd pååđvuõđ õõʹnni määusain, koid õõʹnni lij čõnnõõttâm ouddâl ââʹnnemvuõiggâdvuõđ loopptummuš.